Sot, Greqia përballet me një bllokim total për shkak të një greve të përgjithshme 24-orëshe të organizuar nga sindikata kryesore e sektorit privat, GSEE, dhe federata e administratës shtetërore, ADEDY. Greva, që fillon në orën 10:30, përfshin protesta dhe tubime në Athinë dhe qytetet kryesore të vendit.
Sektori i transportit publik do të funksionojë me kufizime, ndërsa anijet nuk do të dalin në det duke mbetur të ankoruara në porte. Grevës i janë bashkuar mjekët e spitaleve shtetërore, mësuesit, punonjësit e bankave, ndërtuesit, si dhe sindikalistë nga sektori i ushqimit dhe turizmit.
Kërkesat e sindikatave janë të qarta, rritje pagash, frenimi i abuzimeve ekonomike për shkak të inflacionit të lartë, riorganizimi i marrëdhënieve të punës, sigurimi i strehimit të përballueshëm dhe zbatimi i programeve sociale për strehimin.
