FIFA ka prezantuar maskotat e Kupës së Botës 2026: Clutch, shqiponja qerose, dreri Maple dhe leopardi Zayu përfaqësojnë tre shtetet mikpritëse të turneut të vitit të ardhshëm.
“Maple, Zayu dhe Clutch janë plot gëzim, energji dhe shpirt bashkëpunimi, njësoj si vetë Kupa e Botës FIFA”, tha presidenti Gianni Infantino në një deklaratë të së enjtes.
FIFA thotë se tri maskotat përfaqësojnë pjesë nga kultura e vendit përkatës.
“Dreri Maple është lindur për t’u endur, udhëtuar në të gjitha provincat e territoret e Kanadasë duke u lidhur me njerëzit dhe përqafuar kulturën e pasur të vendit”, thuhet në deklaratën e publikuar të enjten.
Zayu vjen nga xhunglat e Meksikës dhe përfaqëson kulturën e pasur. “Zayu përqafon kulturën meksikane përmes kërcimit, ushqimit dhe traditës duke bashkuar njerëzit përtej kufijve me pasion. Më shumë se një sportist, Zayu është një simbol i kulturës dhe lidhjes që mban me krenari zemrën e Meksikës.”
Mbi Shtetet e Bashkuara, fluturon Clutch që përqafon “çdo kulturë, lojë dhe moment me kureshtje dhe optimizëm të pakufishëm.”
Tri maskotat janë edhe lojtarë. Maple është portieri, Zayu sulmuesi kurse Clutch mesfushori.
Sipas FIFA, maskotat “po vijnë së bashku për të simbolizuar unitetin, diversitetin dhe pasionin e përbashkët për lojën e bukur.”
Ndeshja hapëse për Kupën e Botës 2026 do të jetë në kryeqytetin meksikan në “Estadio Azteca” më 11 qershor 2026. Finalja do të jetë pas pak më shumë se një muaji, në “MetLife Stadium” në Nju-Xhersi më 19 korrik.
Për herë të parë, finalja do të ketë edhe një koncert në pushimin midis ndeshjes. Kalendari përfshin 104 ndeshje pasi turneu tanimë përfshin 48 ekipe kombëtare, nga 32 që ishin më parë.
