Presidenti i Ukrainës, Volodymyr Zelensky gjatë fjalimit të tij në sesionin e 80-të të Asamblesë së Përgjithshme të Kombeve të Bashkuara, deklaroi se Rusia nuk dëshiron armëpushim.
“Ukrainasit janë njerëz paqësorë edhe gjatë gjakderdhjes. Nuk ka armëpushim sepse “Rusia refuzon”, thotë ai, duke shtuar se ata rrëmbejnë “mijëra” fëmijë ukrainas.
Zelensky tha se Rusia nuk i ka ndaluar bombardimet, madje as në zonat pranë objekteve bërthamore.
Ai thotë se për shkak se institucionet ndërkombëtare janë “shumë të dobëta, kjo çmenduri vazhdon”.
Presidenti ukrainas vëren se “edhe të jesh pjesë e një aleance ushtarake afatgjatë si NATO nuk do të thotë automatikisht se je i sigurt”, teksa i referohet sulmeve të Rusisë në hapësirat ajrore polake dhe estoneze.
Lufta tashmë ka prekur “shumë njerëz”, thotë Zelensky, duke theksuar se përgjegjësia tani u takon udhëheqësve botërorë për të vepruar.
Ai paralajmëron se Putini “do të vazhdojë ta çojë luftën përpara, gjithnjë e më thellë” nëse nuk ndalet.
Zelensky thotë se u takon atyre që janë të pranishëm në Asamblenë e Përgjithshme të OKB-së të sigurohen që fëmijët e rrëmbyer të mund të kthehen në shtëpi, të burgosurit e luftës të lirohen dhe pengjet të jenë në gjendje të kthehen.
Në momentet e fundit të fjalimit të tij, Zelensky përmend një “takim të mirë” me Presidentin e SHBA-së Donald Trump një ditë më parë.
Ai thotë se e vlerëson mbështetjen e Uashingtonit, por shton, “në fund të fundit paqja varet nga të gjithë ne”.
“Mos heshtni ndërsa Rusia vazhdon ta zvarrisë këtë luftë, ju lutem flisni hapur dhe dënoni atë”, shton ai.
Ai e përfundon fjalimin e tij me: “Slava Ukrainai” – që do të thotë “Lavdi Ukrainës”.
