Kancelari gjerman Friedrich Merz ka kërkuar konsensus kombëtar për domosdoshmërinë e reformave, duke theksuar se Gjermania ndodhet në një nga fazat më të vështira të historisë së saj moderne. Në një fjalim në Bundestag, gjatë diskutimeve për buxhetin e vitit 2026, ai nënvizoi se ekonomia gjermane ka nevojë për ringjallje, dhe kjo kërkon veprime të shpejta dhe strukturore
““Duhet të bëjmë gjithçka për të siguruar që ekonomia jonë të lulëzojë sërish”, tha Merz, duke shtuar se ndërhyrjet synojnë ruajtjen dhe jo shkatërrimin e shtetit social, përmes investimeve në infrastrukturë, arsim dhe strehim.
Kancelari ka njoftuar organizimin e një samiti për industrinë javën e ardhshme, ndërsa i është përgjigjur kritikave nga partitë e majta që e akuzojnë për dobësim të shtetit social. “Refuzimi i reformave nënkupton minimin e themeleve të shtetit social”, tha ai.
Ndërkohë, indeksi i klimës së biznesit në Gjermani ka rënë në mënyrë të papritur gjatë shtatorit, duke rritur dyshimet mes sipërmarrësve për efikasitetin e politikave të qeverisë në përballimin e krizës ekonomike. Sipas Institutit Ifo, indeksi zbriti në 87.7 nga 88.9 muajin e kaluar.
Merz iu përgjigj edhe kritikave për politikat klimatike, duke theksuar se qeveria mbetet e angazhuar për mbrojtjen e klimës, por pa ndjekur ideologji, dhe duke garantuar një “hapje ndaj teknologjisë” që mund të ndihmojë zhvillimin ekonomik.
Në lidhje me çështjet e migracionit, Merz deklaroi se falë reformave të reja, numri i mbërritjeve është ulur me 60%, dhe akuzoi të djathtën ekstreme (AfD) se nuk po e pranon këtë realitet, për arsye politike.
Kancelari ka qenë në qendër të kritikave për mospjesëmarrjen në Asamblenë e Përgjithshme të OKB-së në Nju Jork, duke zgjedhur të qëndrojë në Berlin për të ndjekur nga afër çështjet e brendshme dhe përgatitjen e buxhetit.
Në përmbyllje, Merz bëri thirrje për një dialog të hapur dhe pa gjuhë urrejtjeje, edhe me kundërshtarët politikë, për të ruajtur unitetin shoqëror dhe stabilitetin demokratik.
