Rusia ka paralajmëruar për një kundërpërgjigje nëse Ukraina përdor raketa amerikane me rreze të gjatë kundër territorit rus. Ministria e Jashtme ruse deklaroi se një sulm i tillë do të përfaqësonte “përfshirje direkte të Shteteve të Bashkuara dhe aleatëve të saj në armiqësi kundër Rusisë.”
Presidenti Joe Biden ka miratuar përdorimin e raketave ATACMS nga Ukraina. Ky, një ndryshim i madh në politikën amerikane, dy muaj përpara se ai të largohet nga Shtëpia e Bardhë. Ende nuk është e qartë nëse presidenti i zgjedhur, Donald Trump, është konsultuar për këtë vendim dhe nëse ai do ta mbështesë, pasi ka premtuar t’i japë fund luftës Rusi-Ukrainë.
Ukraina më parë kishte marrë raketa amerikane ATACMS, si dhe raketa të ngjashme Storm Shadow nga Franca dhe Britania, por përdorimi i tyre kundër Rusisë ishte ndaluar nga aleatët perëndimorë. Heqja e këtij kufizimi nga Biden është një moment i rëndësishëm në luftë, e cila më 21 nëntor shënon ditën e 1000-të.
Rusia ka përshkallëzuar sulmet ndaj infrastrukturës ukrainase ndërsa luftimet në terren duket se kanë ngecur. Ndërkohë, më shumë se 10,000 ushtarë nga Koreja e Veriut janë dërguar në rajonin rus të Kurskut për të ndihmuar forcat e Presidentit Vladimir Putin. Raportet e pakonfirmuara sugjerojnë se Koreja e Veriut mund të dërgojë deri në 100,000 ushtarë, krahas artilerisë dhe armëve të tjera.
Presidenti ukrainas Volodymyr Zelensky ka lënë të kuptohet se marrëveshja me SHBA nuk do të shpallet zyrtarisht, duke thënë: “Raketat do të flasin vetë.”
Vendimi i Biden shihet nga Perëndimi si një mesazh për Presidentin Putin se ai nuk mund ta fitojë luftën ushtarakisht. Megjithatë, Kremlini e ka dënuar këtë hap, duke akuzuar SHBA-në se po “shton benzinë në zjarr.”
Lufta vazhdon të shkaktojë viktima të shumta, me sulme intensive ruse gjatë fundjavës që kanë shkaktuar ndërprerje të mëdha të energjisë në Ukrainë dhe viktima në Odesa.
Donald Trump, i cili pritet të marrë detyrën si president më 20 janar, ende nuk ka reaguar ndaj këtij vendimi. Ai ka premtuar t’i japë fund përfshirjes së SHBA-së në luftërat e huaja dhe të përmirësojë jetën e amerikanëve, duke deklaruar gjithashtu se do t’i japë fund luftës Ukrainë-Rusi brenda 24 orëve, por pa dhënë detaje se si.
Ndërkohë, Presidenti francez Emmanuel Macron ka përshëndetur vendimin e Biden si një hap pozitiv, duke hapur mundësinë që Franca dhe Britania të autorizojnë përdorimin e raketave Storm Shadow nga Ukraina kundër Rusisë.
Nga ana tjetër, Presidenti kinez Xi Jinping ka bërë thirrje për zbutjen e krizës dhe arritjen e një zgjidhjeje politike, duke mbështetur Rusinë ekonomikisht në përballjen me sanksionet e SHBA dhe BE, por duke mohuar furnizimin me armë për Moskën.
