Në një intervistë të fundit në podcastin PIKË, Nenad Čanak, lideri i Lidhjes Socialdemokrate të Vojvodinës, kritikoi ashpër qeverisjen aktuale në Serbi, duke e akuzuar atë për kapje nga kriminelët që veprojnë nën drejtimin e presidentit Aleksandar Vuçiq.
Ai theksoi se pushteti ekzekutiv aktual është nën kontrollin personal të një grupi të vogël, të udhëhequr nga figura si Milan Radoiçiq dhe Zvonko Veselinoviq, të cilët, sipas tij, nuk kanë nevojë për një vërtetim formal si kriminelë, pasi veprimet e tyre janë të dokumentuara.
Čanak po ashtu e kritikoi perceptimin publik të Vojislav Sheshelit, duke e quajtur atë “kriminel lufte në pension” që, pavarësisht dënimit në Hagë, vazhdon të ushtrojë ndikim politik.
Ai e përshkroi ironikisht situatën duke sjellë shembuj nga policia, ku individë pa kualifikime të nevojshme, të rekrutuar përmes shërbimit sekret BIA, fitojnë pozita të larta mjaft shpejt, duke thënë se këta persona kanë pasur profesion si shitës veturash.
Duke e krahasuar regjimin aktual me atë të Sllobodan Millosheviqit, Čanak theksoi se, megjithëse ish-lideri shkaktoi dëme të mëdha dhe luftëra, ai ende mbështetej në institucione shtetërore.
Në kontrast, ai argumentoi se Vuçiqi është i mbështetur nga kriminelë që kanë kontrolluar dhe monopolizuar institucionet publike.
Për Çanak, kjo situatë paraqet një degradim të rëndë të institucioneve dhe një rritje të influencës së krimit të organizuar në politikë dhe në polici.
Ai shprehu shqetësim të thellë për këtë dukuri, duke thënë se roli i kriminelëve në qeverisje është një kërcënim serioz për stabilitetin e vendit dhe për moralin e shoqërisë.
