Marash Kumbulla largohet i dëmtuar nga fusha në përballjen Mallorca – Atletico Madrid, priten analizat mjekësore
Mbrojtësi i Kombëtares shqiptare, Marash Kumbulla, ka pësuar një tjetër goditje të rëndë në karrierën e tij. Ai është dëmtuar gjatë sfidës së kampionatit spanjoll mes Mallorca-s dhe Atletico Madrid, duke u detyruar të largohej nga fusha që në minutën e 36-të të ndeshjes.
Kumbulla ndjeu shqetësime të forta fizike dhe kërkoi menjëherë zëvendësim, duke shkaktuar panik në stolin e Mallorcas dhe shqetësim për stafin e Kombëtares shqiptare, që e konsideron atë një nga shtyllat kryesore të mbrojtjes.
Dëmtimi vjen në një moment kur mbrojtësi kuqezi ishte duke fituar hap pas hapi minutat dhe besimin e trajnerit, pas një periudhe të gjatë vuajtjesh për shkak të problemeve të mëparshme fizike. Ky episod mund të ndikojë jo vetëm tek planet e klubit, por edhe tek përgatitjet e Kombëtares për ndeshjet e ardhshme kualifikuese.
Klubi i Mallorcas ka njoftuar se në fillim të javës do të kryhen analizat dhe ekzaminimet e detajuara mjekësore, të cilat do të përcaktojnë shkallën e dëmtimit dhe periudhën e rikuperimit për Kumbullën. Deri atëherë, asnjë afat nuk është përcaktuar për rikthimin e tij.
Nëse bëhet fjalë për një dëmtim serioz, atëherë Mallorca dhe Shqipëria do të humbin një lojtar me përvojë në një moment të rëndësishëm të sezonit, ndërsa tifozët mbeten në ankth për lajmet që pritet të vijnë nga stafi mjekësor.
