Më shumë se 70 persona kanë humbur jetën pas një sulmi me dron ndaj një xhamie në rajonin e Darfurit në Sudan, ka bërë të ditur një burim i lartë mjekësor për BBC-në.
Sulmi i së premtes në qytetin El-Fasher është fajësuar ndaj forcave paraushtarake të Rapid Support Forces (RSF), megjithatë grupi nuk ka marrë përgjegjësinë për sulmin.
RSF dhe ushtria sudaneze janë të përfshira në një luftë të ashpër civile për më shumë se dy vjet.
Paraushtarakët po fitojnë terren ndërsa përpiqen të marrin kontrollin e plotë të El-Fasherit bastioni i fundit i ushtrisë në Darfur dhe shtëpia e mbi 300,000 civilëve të bllokuar nga luftimet.
Një banor tha për BBC se droni goditi gjatë lutjeve të mëngjesit, duke vrarë dhjetëra persona në vend.
Burimi mjekësor tha se 78 persona kanë vdekur dhe rreth 20 të tjerë janë plagosur, por procesi i nxjerrjes së trupave nga rrënojat e ndërtesës është ende në vazhdim.
BBC Verify ka verifikuar pamje që tregojnë rreth 30 trupa të mbështjellë me qefina dhe batanije pranë xhamisë, e cila ndodhej në perëndim të qytetit.
Këtë javë, RSF ka nisur një ofensivë të re ndaj El-Fasherit, që e ka mbajtur të rrethuar për më shumë se një vit. Raportet thonë se kjo përfshin edhe sulme të ashpra ndaj kampit Abu Shouk për të zhvendosurit, afër qytetit.
Pamjet satelitore sugjerojnë se njësitë e RSF-së tani kontrollojnë pjesën më të madhe të kampit, sipas Laboratorit të Kërkimeve Humanitare të Universitetit Yale (HRL), që monitoron konfliktet.
Sipas këtij laboratori, pamjet tregojnë gjithashtu se RSF ka hyrë në selinë e Forcave të Përbashkëta, një aleancë e grupeve të armatosura që mbështesin ushtrinë sudaneze.
Kjo seli ndodhet në një ish-kompleks të OKB-së, i konsideruar si një vijë mbrojtëse kritike.
BBC ka verifikuar pamje që tregojnë luftëtarë të RSF-së brenda kompleksit të madh, megjithatë nuk është e qartë nëse ata kanë marrë kontroll të plotë.
Këto përparime të dukshme do të vendosnin aeroportin e El-Fasherit dhe selinë e divizionit të ushtrisë brenda rrezes së drejtpërdrejtë të zjarrit të RSF-së.
HRL paralajmëron se El-Fasheri do të bjerë në duart e RSF-së nëse ushtria sudaneze nuk merr përforcime të menjëhershme.
Marrja e plotë e qytetit nga RSF do të përforconte kontrollin e grupit mbi pjesën perëndimore të vendit dhe do të konsolidonte ndarjen de facto të Sudanit, me ushtrinë që kontrollon veriun dhe lindjen.
Analistët dhe aktivistët për Sudanin frikësohen se grupi paraushtarak do të sulmojë civilët që ende ndodhen në qytet, shumica e të cilëve i përkasin grupeve etnike që ata i konsiderojnë si armiq.
Të premten, një raport i Kombeve të Bashkuara paralajmëroi për “etnicizimin në rritje të konfliktit”, duke thënë se të dyja palët po hakmerren ndaj personave të akuzuar për bashkëpunim me kundërshtarët.
Megjithatë, OKB-ja dhe organizata të tjera ndërkombëtare kanë dokumentuar gjithashtu një politikë sistematike të pastrimit etnik nga RSF kundër komuniteteve jo-arabe në territoret që ata marrin nën kontroll.
Në një raport të fundit, organizata humanitare Mjekët pa Kufij tha se trupat e RSF-së “kanë folur për plane për të ‘pastruar El-Fasherin’ nga komuniteti i tij jo-arab…”.
RSF më parë i ka mohuar këto akuza, duke thënë se nuk kanë lidhje me “konfliktet fisnore”.
