Një 54-vjeçar shqiptar ka mbetur i plagosur rëndë gjatë një tentative grabitjeje në një argjendari në Valença, Portugali. Ngjarja ka ndodhur në argjendarinë “Cacho,” e vendosur në Avenida Miguel Dantas, ku një grup prej pesë personash tentoi të grabiste dyqanin, duke sulmuar fizikisht edhe një prej pronarëve të tij.
Grupi i grabitësve, i cili përfshinte shtetas shqiptarë, marokenë dhe italianë, ishte prej kohësh nën vëzhgimin e policisë portugeze dhe një prokurori, pasi dyshohej për lidhje me aktivitete kriminale në Portugali dhe Spanjë. Kur autorët filluan grabitjen, forcat e rendit ndërhynë menjëherë, duke hapur zjarr në ajër.
Në përballje, njëri prej grabitësve kërcënoi prokurorin me një shufër hekuri, duke e detyruar këtë të fundit të përdorë armën e zjarrit. Prokurori e qëlloi 54-vjeçarin shqiptar në bark dhe në kyçin e dorës. Pas incidentit, i plagosuri pësoi arrest kardiak, por iu dha ndihma e parë në vendngjarje nga vetë prokurori, i cili kreu manovra reanimative. Më pas, shqiptari u transportua me urgjencë në spitalin “Viana do Castelo,” ku mbërriti me puls të stabilizuar.
Autoritetet portugeze kanë konfirmuar se të dyshuarit ishin të armatosur dhe tentuan të kryenin grabitjen e dhunshme. Shtetasi shqiptar rezulton me vizë qëndrimi në Maltë, ndërsa katër të tjerët janë identifikuar si shtetas nga Maroku dhe Italia. Hetimet për këtë ngjarje të rëndë janë duke vazhduar
