Në orët e para të mëngjesit të sotëm, rreth orës 00:55, u raportua për një shpërthim të dyshuar me lëndë plasëse në rrugën “Arjan Sala” në Tiranë. Sipas informacionit të ofruar nga policia, lënda shpërthyese ishte vendosur në murin rrethues të shtëpisë së deputetit demokrat Xhelal Mziu.
Ngjarja ka lënë pas vetëm dëme materiale, ndërsa nuk raportohet për të lënduar. Autorët ende nuk janë kapur, dhe grupi hetimor po punon për të mësuar motivet dhe për të identifikuar përgjegjësit.
Pamjet e publikuara tregojnë momentin kur dëgjohet shpërthimi i fortë, ndërkohë që banorët u tronditën nga zhurma.
Policia ka nisur hetimet, duke përfshirë sigurimin e pamjeve të kamerave të sigurisë dhe marrjen e dëshmive nga banorët përreth. Ende nuk dihet nëse shpërthimi ka qenë sulm i drejtpërdrejtë ndaj deputetit apo për qëllime intimidimi.
