Vlera e arit ka pësuar rënie për shkak të një rritjeje të lehtë të dollarit, pasi një ditë më parë arriti një rekord të ri, për shkak të pritshmërive për ulje të normave të interesit nga Rezerva Federale.
Ari spot ra me 0.5%, në 3,671.61 dollarë për ons, pasi arriti një rekord të ri në 3,702.95 dollarë një ditë më parë. Ndërkohë, kontratat ardhshme të arit amerikan për dorëzim në dhjetor ranë me 0.4%, në 3,709 dollarë.
“Ngjitja e arit deri në 3,700 dollarë u ndihmua nga rënia e dollarit amerikan dhe nga pritshmëritë që Fed mund të sinjalizojë ulje të mëtejshme të normave para fundit të vitit,” shpjegojnë analistët.
Indeksi i dollarit amerikan u rrit me 0.1% pasi ra në nivelin më të ulët në më shumë se dy muaj. Të dhënat e publikuara treguan se shitjet me pakicë në SHBA u rritën më shumë se sa pritej në gusht, por një treg pune në dobësim dhe shtrenjtimi i çmimeve për shkak të tarifave paraqesin rreziqe për vazhdimësinë e konsumit të fortë.
Banka qendrore amerikane pritet të ndërmarrë një ulje të normës së interesit me 0.25 pikë përqindje, për të mbështetur tregun e punës. Normat më të ulëta të interesit ulin koston e mbajtjes së aseteve që nuk gjenerojnë të ardhura, si ari.
Presidenti i SHBA-së, Donald Trump, ka kërkuar nga kreu i Fed, Jerome Powell, që të ndërmarrë një ulje “më të madhe” të normave të interesit.Ndërkohë, argjendi spot ra me 1.7%, në 41.86 dollarë për ons, ndërsa platini ishte i qëndrueshëm në 1,391.15 dollarë.
