Tre persona kanë shpëtuar pa lëndime pasi një aeroplan i vogël u rrëzua pranë një gjimnazi në pjesën lindore të Torontos të hënën në mbrëmje, pas një defekti në motor.
Piloti dhe dy pasagjerët dolën pa lëndime nga aeroplani i vogël që u rrëzua jashtë shkollës së mesme Monarch Park Collegiate Institute, në zonën e rrugëve Hanson Street dhe Coxwell Avenue, tha Shefi i Zjarrfikësve të Torontos, Jim Jessop.
Bordi i Sigurisë së Transportit të Kanadasë, i cili ka nisur një hetim për ngjarjen, deklaroi të martën se avioni ishte nisur nga Orillia dhe kishte pësuar defekt në motor gjatë fluturimit drejt aeroportit Billy Bishop. Hetuesit ndodheshin në vendngjarje të hënën në mbrëmje për të vlerësuar situatën dhe për të marrë dëshmi nga dëshmitarët.
CBS News raporton se zjarrfikësit u thirrën në vendngjarje pak pas orës 20:15 dhe e gjetën avionin të përplasur në një gardh, pranë një fushe futbolli.
Tre persona, që besohet të jenë në moshën nga 35 deri në 45 vjeç, ndodheshin në bord. Policia deklaroi në rrjete sociale të martën në mëngjes se nuk është raportuar asnjë lëndim nga incidenti.
“Ishim me shumë fat sonte. Kur isha në vendngjarje dhe pashë sa shumë njerëz ishin në atë fushë duke luajtur futboll… patëm shumë, shumë fat,” tha shefi i zjarrfikësve Jessop.
“Avioni u përplas me gardhin… Më duket se ka kaluar përmes pemëve dhe më pas ka rënë në tokë dhe është rrëshqitur deri tek gardhi. Kështu që ishim me të vërtetë me shumë fat që nuk ra ose nuk u përplas mbi fushë, ku ishin të gjithë ata njerëz duke luajtur futboll,” shtoi ai.
Jessop siguroi se nuk ka më rrezik për publikun. “Kjo është e rrallë… Të shohësh një avion që ulet me përplasje në zemër të qytetit… është diçka që nuk e kam parë në gati 30 vite përvojë, dhe është jashtëzakonisht e rrallë. Kemi pasur shumë, shumë fat që nuk pati të lënduar dhe që përfundoi kështu, sepse mund të kishte qenë shumë më keq.”
Mësimet në shkollën Monarch Park do të vazhdojnë normalisht, por një pjesë e parkingut do të jetë e mbyllur të martën.
