Kërpudha patogjene “Candidozyma auris” po përhapet me shpejtësi në spitalet evropiane, sipas raportit të publikuar sot nga Qendra Europiane për Parandalimin dhe Kontrollin e Sëmundjeve (ECDC).
“Pesë vende ,Spanja, Greqia, Italia, Rumania dhe Gjermania, kanë regjistruar shumicën e rasteve gjatë dekadës së fundit”, thuhet në njoftimin e ECDC-së.
*Candidozyma auris”, më parë e njohur si “Candida auris” është një kërpudhë myk e zbuluar për herë të parë në Japoni në vitin 2009 dhe që nga ajo kohë është përhapur në shumë rajone të botës, veçanërisht në spitalet.
Kjo kërpudhë është rezistente ndaj shumë ilaçeve dhe mund të shkaktojë infeksione të rënda te pacientët, Aftësia e saj për të mbijetuar në sipërfaqe të ndryshme dhe në paisje mjekësore, si dhe për t’u përhapur nga personi te personi përmes infeksioneve të kontaktit, e bën kontrollin e saj veçanërisht të vështirë, nënvizon ECDC.
Ndryshe nga koronavirusi, ky patogjen nuk transmetohet përmes ajrit. Studimi i autoritetit shëndetësor tregon një rritje të shpejtë të rasteve të infeksioneve me këtë kërpudhë në BE dhe Zonën Ekonomike Europiane.
Nga viti 2013 deri më 2023 janë regjistruar mbi 4 000 raste në rajon, 1 346 prej tyre vetëm në vitin 2023. Gjermania ka raportuar gjithsej 120 raste gjatë kësaj periudhe, ku 77 kanë ndodhur vetëm gjatë vitit 2023.
ECDC ja thekson se këto shifra janë vetëm “maja e ajsbergut” pasi shumë vende nuk regjistrojnë sistematikisht rastet e infeksioneve me këtë kërpudhë.
Sipas raportit, përpjekjet kombëtare për të zbuluar, monitoruar dhe zbatuar shpejt masa për të ndalur përhapjen e mëtejshme të “Candidozyma auris” mund të zvogëlojnë ndikimin te pacientët spitalorë në Europë.
