Tregtarët u befasuan kur klikuan në faqen e produktit për “Camisa e re blu me lule për meshkuj”, dhe gjetën si model Luigi Mangione, një person që aktualisht ndodhet në burg në Brooklyn duke pritur gjykimin e tij. Pavarësisht situatës së tij ligjore, imazhi i tij në këtë produkt dyshohet se është redaktuar ose krijuar nga inteligjenca artificiale. Pas zbulimit të njoftimit, Shein veproi shpejt për ta hequr atë nga platforma e saj dhe deklaroi se fotografia nuk ishte krijuar ose zgjedhur brenda kompanisë, por ishte ngarkuar nga një furnizues i tretë.
Shein theksoi se kishte vepruar “menjëherë pas zbulimit” për të ndaluar përhapjen e imazhit, pasi kërkimet për “Luigi Mangione Shein” kishin arritur nivele të larta në Google dhe screenshot-et po qarkullonin masivisht në rrjetet sociale. Pas heqjes së listimit, Shein nisi një hetim të brendshëm për të zbuluar origjinën e imazhit dhe për të konfirmuar nëse kishte qenë i krijuar nga inteligjenca artificiale.
Luigi Mangione është i dyshuari kryesor i vrasjes së CEO-t të UnitedHealthcare, Brian Thompson, më 4 dhjetor 2024. Autoritetet e akuzojnë atë për përdorim të një arme 3D dhe për ikje me një biçikletë elektrike. Ai u arrestua pesë ditë më vonë dhe aktualisht përballet me akuza të rënda, duke përfshirë vrasjen dhe terrorizmin.
Megjithatë, në botën online, Mangione është bërë një figurë simbole për shumë amerikanë të rinj që e shohin si një protestues ndaj industrisë së shëndetësisë. Ai ka marrë donacione për mbrojtjen e tij ligjore dhe postime mbështetjeje. Pavarësisht akuzave të tij, shumë e konsiderojnë atë atraktiv dhe stilik.
Kjo nuk është hera e parë që imazhi i tij lidhet me blerjet: pas një paraqitjeje në gjyq në dhjetor, fansat spekuluan për markën e një pulovre që ai kishte veshur, çka bëri që Maison Margiela të ngjitej në trendet e rrjeteve sociale. Së fundmi, fotot e tij gjatë një paraqitjeje gjyqësore janë bërë virale, duke nxitur kërkesa për detaje të stilit të tij, si që ishte rasti edhe me produktin e Shein.
