Istref Myrtezaji është një 75-vjeçar nga fshati Çerravë i Pogradecit, që jeton i vetëm tregon se ka humbur të birin në një aksident dhe prej 10 vjetësh, nuk merr dot dëmshpërblimin.
“Jam njeri pa njeri. Të tre fëmijët më kanë vdekur edhe plaka më ka vdekur. Jam vetëm, mbledh kanaçe me ato jetoj, që marr gjellë edhe bukë. Një pension marr 100 mijë lekë. Jam 75-vjeç nga fshati Çërravë i Pogradecit. Djali mu aksidentua 10 vite më parë në Bilisht. Për këtë unë pajtova një avokat për dëmshpërblimin. Avokati quhet Endri Çela dhe më tha që ai do të merrte 30% dhe unë 70%”, thotë qytetari.
Istrefi hedh dyshime ndaj avokatit të tij, Endri Çela, që po ndjek çështjen. Fillimisht Istrefi tregon se është informuar nga avokati, se gjyqi është fituar në Shkallën e Parë, por më pas nuk ka asnjë informacion, se çfarë ka ndodhur.
“Me këtë avokatin kam folur më tha që nga Shkalla e Dytë kemi kaluar në Shkallë të Parë dhe tani presim, Gjykatën nga Tirana që të marrim përgjigje dhe të bëhet puna. Nuk ka as dy javë që e kam takuar”, shton 75-vjeçari.
Emisioni “Stop” u takua vetë avokatin Çela, i cili thotë se çështja e dëmshpërblimit është në Apel që nga viti 2018 dhe që atëherë, nuk ka dalë një datë gjykimi.
“Stop” u interesua edhe pranë Gjykatës së Apelit, ku konfirmojnë se akoma nuk ka dalë një datë gjykim kërkesa për përshpejtimin e gjykimit në fjalë.
“Ka ndodhur një aksident automobilistik në vitin 2016 ku ka humbur jetën djali i shtetasit Istref Myrtezaji, i cili është edhe klienti im për këtë çështje prokuroria ka filluar hetimet ka arrestuar edhe një person. E ka çuar në gjyq dhe ka rezultuar se nuk ka qenë ky personi përgjegjës, por një mjet i paidentifikuar. Ligjin parashikon se nëse shkaktohet një aksident me pasojë vdekjen nga një mjet i paidentifikuar, organi i cili duhet që ta dëmshpërblejë është Byroja Shqiptare e Sigurimeve me kushtin që mjeti i paidentifikuar të jetë fajtor. Në Gjykatën e Shkallës së parë bëmë padinë dhe u konfirmua që fajtor për aksidentin me vdekje ishte mjeti i paidentifikuar dhe Byroja duhet që ta dëmshpërblejë. Problemi ka ngelur në Tiranë. Nuk është faji jonë që çështjet nuk gjykohen në afat”, tha avokati./Emisioni “Stop”
