Komisioni Evropian, nën udhëheqjen e Ursula von der Leyen, është në qendër të kritikave pas marrëveshjes me Donald Trump për tarifat, për të cilën një sondazh i ri tregon se shumica e evropianëve e vlerësojnë si “poshtëruese”. Sipas një sondazhi të Cluster17 për platformën Le Grand Continent, afërsisht 77% e të anketuarve besojnë se marrëveshja do të sjellë përfitime kryesisht për ekonominë amerikane, ndërsa vetëm 2% e shohin dobinë për ekonominë evropiane.
Anketa përfshiu qytetarët e pesë vendeve, që përbëjnë 60% të popullsisë së BE-së. Rreth 52% e tyre e përshkruan marrëveshjen e korrikut ndërmjet Trump dhe von der Leyen si poshtëruese. Marrëveshja përfshin eliminimin e tarifave për produktet industriale amerikane dhe akses preferencial në treg për disa produkte, ndërkohë që shumica e produkteve evropiane do t’i nënshtrohen një tarife prej 15%. Përveç kësaj, kompanitë evropiane do të investojnë 600 miliardë dollarë në SHBA, ndërsa BE ka marrë përsipër të blejë energji amerikane me vlerë deri në 750 miliardë dollarë.
Megjithatë, von der Leyen e përshëndeti marrëveshjen si të rëndësishme për stabilitetin, duke theksuar se ka shmangur një kërcënim nga Trump për tarifa prej 30%. Analistët, megjithatë, argumentojnë se BE ka bërë koncesione të mëdha dhe ka iu nënshtruar presionit amerikan. Një shumicë prej 75% të evropianëve besojnë se von der Leyen ka vepruar në mënyrë të keqe për interesat evropiane. Po ashtu, 70% e të anketuarve shprehin gatishmërinë për të bojkotuar produktet amerikane, ndërsa 44% e konsiderojnë Trump si një armik të Evropës.
Më shumë se tre të katërtat e të anketuarve shprehen të pakënaqur me menaxhimin e marrëdhënieve të BE-së me Trump dhe 40% dëshirojnë që BE të rezistojë ndaj “tekave” të presidentit amerikan. Një javë para fjalimit të von der Leyen për “Gjendjen e Unionit”, 60% e anketuarve thanë se do ta shihnin dorëheqjen e saj pozitivisht. Edhe pse 85% në Spanjë dhe 61% në Francë dëshirojnë mbetjen e vendit të tyre në BE, 37% besojnë se nëse BE nuk mbron qytetarët nga rreziqet gjeopolitike, duhet shqyrtuar mundësia e largimit.
