Cilësia e dobët e ujit të rrjetit të ujësjellësit në Durrës ka detyruar banorët e këtij qyteti të udhëtojnë deri në 140 kilometra për të siguruar ujë të pijshëm.
Çdo fundjavë, burimi i Shkopetit kthehet në destinacion për dhjetëra familje nga Durrësi, Fushë-Kruja dhe Kurbini, të cilat mbushin bidona e fuçi me ujë natyral për konsum familjar.
Qytetarët shprehen se uji i rrjetit nuk pihet, pasi është i mbushur me klor për shkak të amortizimit të tubacioneve. Sipas tyre, propaganda e qeverisë për ujë cilësor nuk ka asnjë lidhje me realitetin.
“Uji i ujësjellësit në Durrës mund të përdoret vetëm për larje. Për të pirë, jam i detyruar të vij deri këtu. Uji në Shkopet është i pastër dhe pa klor. Sa herë vij, gjej 5-6 makina të tjera që mbushin bidona. Kush ka mundësi ekonomike, e blen ujin në dyqan”, tha një prej qytetarëve.
Fenomeni nuk kufizohet vetëm në Durrës. E njëjta situatë haset edhe në shumë qytete të tjera të vendit, ku uji i rrjetit përdoret vetëm për higjienë, ndërsa për konsum njerëzit detyrohen t’i drejtohen burimeve natyrore ose të blejnë ujë të ambalazhuar. /BalkanWeb
