Një ngjarje e rëndë ka ndodhur pasditen e sotme në qytetin Pirou, në veri të Francës, ku një automjet ka përplasur disa kalimtarë në rrugë.
Sipas mediave franceze, një person ka humbur jetën, ndërsa gjashtë të tjerë kanë mbetur të plagosur, mes tyre edhe dy persona që ndodheshin në automjetin që shkaktoi aksidentin.
Ngjarja ka ndodhur në një zonë të banuar dhe ka shkaktuar panik tek qytetarët. Zjarfikësit dhe ekipet e emergjencës mbërritën menjëherë në vendin e ngjarjes për t’u dhënë ndihmën e parë të lënduarve.
Prefektura e rajonit konfirmoi ngjarjen tragjike, por ende nuk ka dhënë detaje mbi shkaqet e aksidentit. Ndërkohë, policia ka nisur hetimet për të zbardhur rrethanat e plota të ngjarjes.
