Një 15-vjeçar nga Postriba e Shkodrës prej dy ditësh ka humbur kontaktet me familjarët e tij. Babai i tij, shtetasi Agim Bibaj ka bërë kallëzim në Polici pasditen e djeshme, ku kërkon ndihmën e uniformave blu për gjetjen e të birit.
Mësohet se babai Agim Bibaj ka rrëfyer se i biri 15-vjeçar është nisur në mëngjes për në shkollë, por nuk është futur në mësim duke u larguar në drejtim të paditur.
Që nga ai moment nuk ka shkuar në shtëpi gjë e cila ka alarmuar familjen e tij.Arsyeja e largimit sipas babait është se ai i ka bërtitur djalit të tij që të mos bëjë sjellje të keqe dhe sipas tij, nga frika ai i ka treguar shokëve se do të largohet nga banesa.
Efektivët janë angazhuar për të gjetur se ku ndodhet 15 vjeçari dhe se përse është larguar.
Agim Bibaj i bën thirrje kujtdo që mund ta ketë parë djalin e tij që ta njoftojnë. Po ashtu ka një thirrje edhe për të birin duke i thënë që të kthehet sa më parë sepse e kërkojnë nëna, vëllezërit dhe motra.
