Ekipet e punës kanë përfunduar evidentimin e dëmeve të shkaktuara nga zjarri i datës 11 gusht në njësinë Skënderbegas në Gramsh. Sipas të dhënave të marra, zjarri ka shkaktuar dëme të mëdha, ku janë djegur 68 banesa; prej tyre, 10 janë shkatërruar plotësisht dhe kërkojnë rindërtim të plotë, 16 kanë nevojë për rikonstruksion të pjesshëm ndërsa 42 të tjerat ishin shtëpi sezonale ose të pabanueshme. Këto statisticat përfshijnë gjithashtu dëmet në pajisjet elektroshtëpiake dhe mobiljet e banorëve të prekur.
Në aspektin bujqësor, zjarri ka pasur pasoja drastike, duke shkaktuar vdekjen e 215 bagëtive të imta, 9 gjedhëve dhe 7 njëthundrakëve. Të dhënat tregojnë se zjarri shkrumboi gjithsej 44,045 hektarë ullinj, 11,028 hektarë me rrush, 1,451 hektarë bimë medicinale, si dhe 9.5 hektarë pemë frutore dhe arrorë. Megjithatë, për dëmet në pyje, të dhënat nuk janë ende të konfirmuara, pasi sipërfaqja e prekur, kryesisht pyll me pisha, do të verifikohet përmes pamjeve satelitore.
Pas përfundimit të evidentimit të dëmeve, faza e dytë përfshin përllogaritjen financiare të dëmeve. Bashkitë e qarkut kanë filluar të miratojnë fonde ndihme për Gramshin, ndërsa qeveria shqiptare po ashtu merr masa për të mbështetur banorët e prekur. Në këtë moment të vështirë, ka shumë donatorë që kanë shprehur solidaritetin e tyre, duke ofruar ndihma për komunitetin e Skënderbegasit. Kjo situatë e vështirë kërkon një përgjigje të shpejtë dhe efikase për të lehtësuar pasojat e zjarrit dhe për të rikuperuar jetën e banorëve të prekur.
