Pas dy sezonesh verore pa pagesë, gjatë këtij muaji do të nisë aplikimi i tarifës për kalimin në tunelin e Llogarasë. Ministrja Belinda Balluku njoftoi se tarifa do të jetë 250 lekë.
“Pas një analize të gjerë, çmimi i një kalimi në tunel për autovetura është 250 lekë me TVSH, as 10 euro, as 5 euro. Kategoritë më të mëdha, autobusët, trajlerët, do të kenë çmime të posaçme”, tha Balluku.
Për të gjithë drejtuesit e mjeteve, duke filluar nga e premtja do të jetë e aksesueshme edhe rruga Qukës-Qafë Plloçë, që do të shkurtojë distancën nga Tirana në Korçë për rreth 1 orë e 30 minuta.
“Jemi duke përfunduar edhe projekte që kanë qëndruar gjatë, siç ishte ai i Qukës-Qafë Plloçës që është një projekt me shumë probvlematika, komplekistete por nesër në prën 11 do të jetë totalisht e aksesueshme për automjetet, totalisht e përfunduar dhe me sinjalistikën e vendosur tashmë”, tha ministrja.
Po ashtu, Balluku tha se së shpejti do të nisë puna për ndërtimin e një bypassi prej 3 kilometrash për t’i dhënë zgjidhje trafikut që krijohet nga dalja e Tiranës në drejtim të Elbasanit.
