Hekurudhat Polake (PKP) kanë publikuar pamjet e një aksidenti të rëndë të ndodhur më 18 gusht 2025, në linjën Granowo-Stęszew, në veriperëndim të Polonisë.
Një automjet ka shkelur rregullat e qarkullimit, duke thyer barrierat e një kalimi hekurudhor dhe është ndalur mbi shina, ku më pas është përplasur me forcë nga një tren pasagjerësh që udhëtonte në linjën Poznań Główny–Wolsztyn, pjesë e Hekurudhave të Rajonit të Madh të Polonisë.
Për fat të mirë, drejtuesi i mjetit ka shpëtuar me lëndime të lehta dhe është transportuar në spitalin Grodzisk Wielkopolski. Si pasojë e përplasjes, qarkullimi hekurudhor është ndërprerë për rreth dy orë.
Videoja, e cila tregon gjithë ngjarjen – nga ulja e barrierave deri tek momenti i përplasjes – është publikuar nga PKP me qëllim ndërgjegjësimin e publikut dhe promovimin e sjelljes së kujdesshme në afërsi të hekurudhave.
Sipas të dhënave zyrtare, çdo vit në Poloni ndodhin rreth 170 aksidente në kalimet hekurudhore, shpesh me pasoja fatale.
