Kremlini ka bërë të qartë se nuk ka ndërmend të ndalë luftën në Ukrainë, pavarësisht përpjekjeve të Evropës, SHBA-së dhe vetë Kievit për ta sjellë Moskën në tryezën e negociatave.
Zëdhënësi i Vladimir Putinit, Dmitry Peskov, deklaroi se Rusia është e gatshme për “zgjidhje politike dhe diplomatike”, por sipas tij “nuk ka reciprocitet nga pala ukrainase”.
“Ne jemi të gatshëm ta zgjidhim problemin me mjete politike dhe diplomatike. Por deri më tani nuk shohim reciprocitet nga Kievi. Kështu që ne do të vazhdojmë operacionin special ushtarak”, tha Peskov.
Ekspertët ndërkombëtarë e shohin këtë si një strategji të Moskës për të dhënë vetëm sinjale simbolike, duke dërguar delegacione të nivelit të ulët në bisedimet e zhvilluara në Turqi. Sipas tyre, Kremlini kërkon të ruajë mbështetjen e Donald Trump, ndërsa në terren vazhdon agresionin ushtarak shkruan Sky News.
Që prej shkurtit 2022, Rusia ka dërguar dhjetëra mijëra trupa për të sulmuar Ukrainën, duke shënjestruar jo vetëm objektivat ushtarake, por edhe qendra civile me bombardime të përsëritura. Presidenti ukrainas Volodymyr Zelenskyy ka bërë disa herë thirrje për bisedime direkte me Putinin, por pa sukses.
