Një zjarr i madh ka përfshirë fshatin Vajzë të Selenicës që prej mbrëmjes së kaluar, duke shkaktuar dëme të konsiderueshme dhe panik mes banorëve.
Sipas dëshmive, gjatë gjithë natës nuk ka pasur ndërhyrje nga shërbimet zjarrfikëse, ndërsa vetëm në orët e ditës së sotme një mjet zjarrfikës i bashkisë Selenicë, së bashku me vetë banorët e zonës, kanë nisur përpjekjet për të frenuar përhapjen e flakëve.
Zjarri ka marrë përmasa të mëdha, duke shkrumbuar sipërfaqe të gjera me ullishte dhe pemëtari, që përbëjnë burim jetese për banorët. Situata mbetet e rëndë, me rrezik që flakët të përfshijnë edhe zona të tjera nëse nuk shtohen forcat në terren.
Ndërkohë, Bashkia e Selenicës ka vetëm një automjet zjarrfikës në dispozicion, i cili nuk mjafton për situata të tilla. Për këtë arsye, është kërkuar ndihmë urgjente nga Bashkia e Vlorës me mjetet e saj zjarrfikëse, në mënyrë që zjarri të vihet sa më shpejt nën kontroll.
