Një 26-vjeçar shqiptar me profesion bukëpjekës është vënë në qendër të një hetimi në Rodos të Greqisë, pasi një 36-vjeçare që punon si striptiste ka ngritur një akuzë për përdhunim ndaj tij.
Sipas mediave lokale, ngjarja e dyshuar ndodhi në orët e para të mëngjesit të së dielës, kur viktima pretendon se u mor me makinë nga shqiptari dhe përfundoi në një dhomë ku strehohen punëtorë sezonalë. Pas denoncimit, autoritetet greke kanë marrë dëshminë e gruas në prani të një psikologu ekspert dhe kanë nisur një hetim të plotë për çështjen.
36-vjeçarja striptiste pretendon se pavarësisht kundërshtimeve të saj të përsëritura, 26-vjeçari e detyroi të kryente marrëdhënie seksuale, duke ushtruar dhunë fizike dhe psikologjike. Gruaja rrëfen se ishte kapur nga flokët, fyer dhe se përjetoi një atak paniku gjatë aktit, ndërsa më pas, ndonëse e frikësuar, arriti të largohej. Ajo ka dorëzuar edhe prova për sjellje kërcënuese që, sipas saj, kanë vijuar edhe pas ngjarjes përfshirë ndjekjen me makinë dhe dëmtimin e makinës së saj.
Nga ana tjetër, i riu shqiptar i mohon kategorikisht akuzat, duke pretenduar se gjithçka ka ndodhur me konsensus dhe se qëndrimi i tij jashtë dyqanit ku ajo punonte ishte një shenjë dashurie, jo frikësimi. Ai u shpreh se kishte ndjenja për gruan dhe se marrëdhënia ishte e dakordësuar nga të dy palët.
Ndaj të riut shqiptar është ngritur një kallëzim penal për përdhunim dhe çështja do të trajtohet nga prokuroria kompetente. Hetimet pritet të përfshijnë edhe analizën mjeko-ligjore dhe shqyrtimin e komunikimeve përmes aplikacioneve si Viber, që të dy palët kanë përdorur.
