Të paktën tetë persona humbën jetën dhe mbi 30 të tjerë u plagosën, pas një sulmi masiv rus gjatë natës në kryeqytetin ukrainas, Kiev. Mes viktimave janë edhe dy fëmijë, konfirmuan autoritetet ukrainase.
Presidenti Volodymyr Zelensky e cilësoi sulmin si një akt të qëllimshëm dhune dhe tha se Rusia “po zgjedh raketat në vend të tryezës së negociatave”.
Ai kërkoi reagim të menjëhershëm ndërkombëtar dhe sanksione të reja ndaj Moskës, duke u bërë thirrje veçanërisht Kinës dhe Hungarisë që të mbajnë një qëndrim të qartë.
Sipas kryetarit të bashkisë së Kievit, Vitali Klitschko, 38 persona u plagosën, 30 prej të cilëve janë në spital.
Disa ndërtesa banimi u goditën, përfshirë një pallat pesëkatësh që u shemb plotësisht. Një kopsht fëmijësh dhe një qendër tregtare u dëmtuan rëndë.
Komanda ushtarake e Kievit konfirmoi se sulmi u krye me dronë dhe raketa të llojeve balistike, kruz dhe hipersonike.
