Presidenti i SHBA-së, Donald Trump, ditën e sotme i dërgoi Ukrainës një mesazh për Ditën e Pavarësisë.
Trump lavdëroi guximin e Ukrainës duke shtuar se Shtetet e Bashkuara besojnë në të ardhmen e tyre si një shtet i pavarur.
Letra e Trump u publikua në platformën X nga Presidenti i Ukrainës, Volodymyr Zelensky, i cili tha: Ne nuk do të humbasim.
Udhëheqës të tjerë botërorë, përfshirë Presidentin Kinez Xi Jinping, Mbreti Charles III dhe Papa Leo XIV, gjithashtu dhanë mesazhe për të shënuar Ditën e Pavarësisë.
Kryeministri kanadez Mark Carney shfrytëzoi rastin për të bërë vizitën e tij të parë zyrtare në Ukrainë, duke deklaruar në X se mbështetja e vendit të tij për Kievin është “e palëkundur dhe ne jemi me ju në çdo hap të rrugës në luftën tuaj për të mbrojtur sovranitetin tuaj”.
Keith Kellogg, i dërguari i administratës Trump për Rusinë dhe Ukrainën, mori pjesë gjithashtu në ceremoninë e Ditës së Pavarësisë në Kiev të dielën.
Në letër, Trump shkroi: “Populli i Ukrainës ka një shpirt të pathyeshëm dhe guximi juaj frymëzon shumë njerëz. Ndërsa shënoni këtë ditë të rëndësishme, dijeni se Shtetet e Bashkuara respektojnë luftën tuaj, nderojnë sakrificat tuaja dhe besojnë në të ardhmen tuaj si një komb i pavarur.”
“Tani është momenti për t’i dhënë fund vrasjeve të pakuptimta. Shtetet e Bashkuara mbështesin një zgjidhje të negociuar që çon në një paqe të qëndrueshme që i jep fund gjakderdhjes dhe mbron sovranitetin dhe dinjitetin e Ukrainës”, shtoi Trump.
Zelensky e falënderoi Trumpin për mesazhin e tij dhe mbajti fjalimin e tij para ukrainasve, duke thënë se vendi do të vazhdojë të festojë Ditën e Pavarësisë edhe pas njëqind vjetësh.
Duke iu referuar bisedimeve të fundit me Trumpin dhe udhëheqësit evropianë për të çuar përpara një plan paqeje për Ukrainën, Zelensky tha: “Ukraina nuk ka fituar ende plotësisht, por sigurisht që nuk do të humbasë. Ukraina ka siguruar pavarësinë e saj. Ukraina nuk është viktimë; është luftëtare. Ukraina nuk lyp; ajo ofron. Aleancë dhe partneritet.”
Në prag të Ditës së Pavarësisë, Rusia lëshoi 72 dronë dhe një raketë balistike drejt Ukrainës, shumica e të cilave u rrëzuan, sipas Forcave Ajrore të Ukrainës.
