Policia e Tiranës ka finalizuar me sukses operacionin e koduar “Quick Response”, duke zbardhur dhe dokumentuar ngjarjen e ndodhur një ditë më parë në zonën e Kombinatit, ku u qëllua me armë zjarri në drejtim të një automjeti në të cilin ndodheshin dy shtetas.
Sipas hetimeve paraprake, ngjarja ndodhi rreth orës 12:10, pas një konflikti për motive të dobëta midis dy grupeve personash. Si pasojë, shtetasi Oltjon Asllani (Vodollari), 28 vjeç, qëlloi me armë zjarri drejt automjetit të shtetasve R. K., 38 vjeç dhe Zh. K., duke rrezikuar jetën e tyre dhe të kalimtarëve.
Në momentin e ngjarjes, automjeti nga i cili u krye të shtënat drejtohej nga shtetasi Serxho Bajza, 30 vjeç. Të dy autorët janë arrestuar nga forcat operacionale dhe specialistët për Hetimin e Krimeve të Rënda në bashkëpunim me Komisariatin Nr. 6.
Po ashtu, janë proceduar penalisht edhe shtetasit R. K., Zh. K., F. K. dhe B. M., pasi dyshohet se kanë qenë të përfshirë në konflikt fizik me autorët përpara të shtënave.
Nga të shtënat nuk pati të lënduar, por u shkaktuan vetëm dëme materiale. Automjeti i përdorur nga autorët u sekuestrua si provë materiale, ndërsa vijojnë kërkimet për armën e përdorur në krim.
Materialet iu referuan Prokurorisë së Tiranës për veprime të mëtejshme procedurale.
