Pushuesit në Costa Blanca të Spanjës janë përballur me një rrezik të pazakontë këto ditë. Në brigje është shfaqur “dragoi blu”, një krijesë detare e rrallë dhe shumë e rrezikshme.
Pamja e saj është tejet tërheqëse, me ngjyra blu të ndezura që e bëjnë të duket sikur vjen nga një përrallë, por ekspertët paralajmërojnë se bëhet fjalë për një nga speciet më helmuese të oqeanit. Pickimi i saj shkakton dhimbje ekstreme dhe në raste të caktuara mund të rezultojë edhe fatal.
Autoritetet kanë ngritur flamuj të kuq në disa prej plazheve më të frekuentuara për të paralajmëruar turistët, ndërsa disa zona janë mbyllur përkohësisht.
Biologët detarë shpjegojnë se dragoi blu, i njohur edhe si Glaucus atlanticus, jeton zakonisht në ujërat tropikale, por rrymat detare e kanë sjellë deri në brigjet e Spanjës.
Pushuesve u bëhet thirrje të mos e prekin në asnjë mënyrë këtë krijesë nëse e shohin pranë bregut, por të njoftojnë menjëherë rojet bregdetare.
