Një mjet lundrues i Policisë Kufitare i llojit Jet-Ski, është përplasur me një tjetër mjet lundrues të së njëjtit lloj në zonën e Jonufrës.
Ngjarja raportohet të ketë ndodhur rreth orës 18:20 të pasdites së sotme teksa një shtetas me kanoe kërkoi ndihmë nga Policia Kufitare. Teksa mjeti lundrues i autoriteteve ishte nisur drejt personit që kërkoi ndihmë, u përplas me një tjetër Jet-Ski ku ndodheshin dy persona.
Si pasojë e përplasjes, i dëmtuar lehtë ka mbetur një prej shtetasve, ndërsa autoritetet po vijojnë hetimet për zbardhjen e plotë të rrethanave që shkaktuan aksidentin.
“Vlorë/Informacion paraprak
Sot, rreth orës 18:20, pas marrjes së një njoftimi se në zonën e Jonufrës ndodhej një shtetas me kanoe që kërkonte ndihmë, shërbimet e Policisë Kufitare u nisën menjëherë për në vendngjarje.
Gjatë lundrimit drejt vendit të njoftuar, mjeti lundrues tip jet ski i Policisë Kufitare është përfshirë në një përplasje me një tjetër mjet lundrues jet ski ku ndodheshin dy shtetas. Si pasojë, njëri prej tyre (drejtuesi) ka marrë dëmtime të lehta.
Nën drejtimin e Prokurorisë, po kryhen veprimet procedurale, në bashkëpunim me AMP, për zbardhjen e plotë të rrethanave të ngjarjes”, raporton policia.
