Zvicra do t’i japë presidentit rus Vladimir Putin “imunitet” nëse ai viziton vendin për bisedime hipotetike paqeje me Ukrainën.
Kështu deklaroi sot ministri i Jashtëm Zvicerian Ignacio Cassis, pasi Gjeneva po përflitet si një nga qytetet ku mund të zhvillohet takimi Putin-Zelensky, me propozim edhe të Presidentit francez, Emmanuel Macron.
Presidenti amerikan Donald Trump propozoi dje një takim trepalësh midis presidentëve të Rusisë dhe Ukrainës, me pjesëmarrjen e tij. Duket se hapat janë të mbarë për realizimin e tij, por për momentin, as koha dhe as vendi nuk janë përcaktuar.
Megjithatë, Presidenti francez Emmanuel Macron propozoi sot që takimi të mbahej në Gjenevë, një ide me të cilën u pajtua edhe ministri i jashtëm italian Antonio Tajani.
Por, ndaj Presidentit rus Vladimir Putin rëndon një urdhër arresti i lëshuar nga Gjykata Ndërkombëtare Penale që nga viti 2023 për krime lufte në Ukrainë të kryera gjatë pushtimit rus. Megjithatë, siç vëren Politico, Cassis sqaroi se shefi i Kremlinit nuk do të arrestohet nëse do të vinte në vend për të marrë pjesë në një konferencë paqeje.
Ai shtoi se Zvicra është “e gatshme për të pritur një takim të tillë”. “Ne gjithmonë e kemi shprehur gatishmërinë tonë, por sigurisht kjo varet nga vullneti i fuqive të mëdha”, tha ai.
“Zvicra e ka sqaruar situatën ligjore”, shtoi ministri, dhe mund të presë një samit të tillë “pavarësisht urdhër-arresti kundër Putinit, për shkak të rolit tonë të veçantë dhe rolit të Gjenevës si selia evropiane e OKB-së”.
