Një grup prej rreth 600 zyrtarësh të dale në pension të sigurisë izraelite, përfshirë ish-krerë të agjencive të inteligjencës, i kanë shkruar Presidentit të SHBA-së Donald Trump për të ushtruar presion mbi Izraelin që t’i japë fund menjëherë luftës në Gaza.
“Është gjykimi ynë profesional se Hamasi nuk përbën më një kërcënim strategjik për Izraelin. Besueshmëria juaj me shumicën dërrmuese të izraelitëve rrit aftësinë tuaj për ta drejtuar Kryeministrin Netanyahu dhe qeverinë e tij në drejtimin e duhur: Jepini fund luftës, ktheni pengjet, ndaloni vuajtjet”, thanë zyrtarët.
Apeli i tyre vjen mes raportimeve se Netanyahu po shtyn përpara zgjerimin e operacioneve ushtarake në Gaza, ndërsa bisedimet indirekte për armëpushim me Hamasin kanë ngecur.
Izraeli nisi një luftë shkatërruese në Gaza pas sulmit të Hamasit në Izraelin jugor më 7 tetor 2023, në të cilin u vranë rreth 1,200 njerëz dhe 251 u morën peng në Gaza.
Më shumë se 60,000 njerëz janë vrarë si pasojë e fushatës ushtarake të Izraelit në Gaza që atëherë, thotë ministria e shëndetësisë e drejtuar nga Hamasi.
Të hënën, ministria raportoi se të paktën 94 persona ishin vrarë në Gaza gjatë ditës së kaluar, përfshirë dhjetëra që tha se kishin vdekur në sulmet izraelite.
Të paktën 24 persona janë vrarë ndërsa kërkonin ndihmë, shtoi ajo. Raportime të tilla janë bërë pothuajse të përditshme në muajt e fundit, por janë të vështira për t’u verifikuar pasi gazetarët ndërkombëtarë, përfshirë BBC-në, janë bllokuar nga Izraeli që të hyjnë në Gaza në mënyrë të pavarur
