Rrugëtimi i ri i mëmësisë është një lumturi e papërshkrueshme për Dafina Zeqirin. Këngëtarja dhe bashkëshorti i saj, Kreshnik Gjergji, u bënë prindër të një djali dy javë më parë. Momenti i ardhjes së Daskanit në jetë është ende i pabesueshëm për yllin e skenës shqiptare.
Ajo ka ndarë në InstaStory videon duke u përpjekur të përshkruajë emocionet e saj dhe ndjesitë si nënë.
“Sa herë shoh videon që djali im erdhi në këtë botë, qaj. Kanë kaluar mbi dy javë dhe ende nuk e besoj sa i përsosur është. Qenia më e çmuar që më kanë parë sytë. Zemra ime është e tejmbushur me dashuri, mirënjohje, me diçka që s’mund ta shpreh me fjalë. Faleminderit Zot, për këtë mrekulli. Faleminderit bashkëshortit tim! Ne krijuam jetë dhe ai është gjithçka!”
Daskan erdhi në jetë më 17 korrik, një lajm që çifti e shpërndau vetë në rrjetet sociale duke zbuluar edhe emrin e veçantë. Më pas, Kreshniku ka shpjeguar edhe kuptimin e tij në një koment në postim ku shkroi: “Emër me rrënjë ilire, që mbart forcën e burrërisë, nderit dhe udhëheqjes. Një emër që tingëllon lashtësi, si zëri i një prijësi fisnor. Daskan është emër – është krenari, është gjak ilir.”
