Një tërmet me magnitudë 8.8 goditi rajonin lindor të Rusisë në orët e para të së mërkurës, duke shkaktuar valë cunami që arritën bregjet e Japonisë dhe Alaskës, ndërsa paralajmërime u lëshuan edhe për Hawaiin, Amerikën e Veriut dhe Qendrore si dhe për ishujt e Paqësorit deri në Zelandën e Re.
Autoritetet këshilluan banorët e zonave bregdetare të zhvendosen në vende më të larta, duke paralajmëruar se rreziku nga cunami mund të zgjasë më shumë se 24 orë. Megjithatë, në vendet ku valët kanë arritur tashmë në breg, nuk janë raportuar dëme të konsiderueshme, sipas agjencisë së lajmeve AP.
Në Alaskë, në komunitetet Amchitka dhe Adak, u regjistruan valë më pak se 30 centimetra mbi nivelin normal të baticës, njoftoi Dave Snider, koordinator i paralajmërimeve për cunami në Qendrën Kombëtare të Paralajmërimeve për Cunami në Alaskë.
Ndërkohë, valë të bardha janë parë në bregun e ishullit Hokkaido në veri të Japonisë, si dhe në prefekturat Ibaraki dhe Chiba, pranë Tokios, sipas pamjeve të transmetuara nga televizioni publik japonez NHK.
Agjencia Meteorologjike e Japonisë raportoi një cunami prej 50 centimetrash në portin Ishinomaki, në Japoninë veriore, që ishte niveli më i lartë i regjistruar deri më tani në rajonet përreth. Sipas zyrtarit Shiji Kiyomoto nga kjo agjenci, priten ende valë më të larta.
Në Gadishullin Kamchatka, rajoni më i afërt me epiqendrën e tërmetit, janë raportuar dëme materiale dhe evakuime, por fatmirësisht nuk ka pasur raportime për lëndime serioze.
