SPAK ka marrë për herë të parë dëshminë e një bashkëpunëtoreje të drejtësisë në një hetim që prek zyrtarë të lartë të shtetit.
Në qendër të çështjes ndodhet kryetari i Bashkisë së Tiranës, Erion Veliaj, dhe bashkëshortja e tij, Ajola Xoxa. Një prej bashkëpunëtoreve më të afërta të Xoxës, Adela Kondakçiu, ka pranuar të bashkëpunojë me drejtësinë dhe ka zbardhur të gjithë skemën e dyshuar të korrupsionit dhe pastrimit të parave.
Kondakçiu, e cila njihet si përgjegjëse për menaxhimin financiar në rrethin e Xoxës, ka dorëzuar prova të shumta në SPAK, duke përfshirë dokumente dhe të dhëna që rëndojnë pozitat e çiftit.
Ajo është aktualisht e pandehur, por në bazë të bashkëpunimit të saj, mund të përfitojë nga lehtësimi i dënimit.
Ndërkohë, SPAK ka siguruar dëshmi nga 97 persona, si dhe një sasi të madhe provash të tjera, kontrata, bilance financiare dhe komunikime të përgjuara që do të përdoren për të mbështetur akuzat në dosjen “Veliaj”.
