Policia e Tiranës ka shpallur në kërkim vëllezërit Ferhat Kaja, 31 vjeç dhe Olti Kaja, 30 vjeç, pasi akuzohen se dy ditë më parë, më datë 21 korrik, tek kompleksi “Delijorgji”, në bashkëpunim me njëri-tjetrin, kanë goditur me grushte dhe me sende të forta shtetasit E. K dhe Laert Kasaj.
Vëllezërit Ferhat dhe Olti Kaja, rezultojnë të jenë pronarë të një lokali përballë kompleksit “Delijorgji”.
Ata dyshohet se kanë dhunuar pronarin e një lokali tjetër, Laert Kasaj.
Shkak për ngjarjen dyshohet të jetë bërë një konflikt për hapësirat publike.
Burime pranë policisë thonë se në ditët e fundit, nëpër faqe të ndryshme online, ka pasur disa denoncime të ndryshme për mos heqjen e pjesëve metalike mbi trotuar.
Vëllezërit Kaja, kanë pasur dyshime se biznesi i tyre ishte publikuar nga Kasaj dhe kanë shkuar për t’i kërkuar sqarim, por Kasaj menjëherë ka reaguar keq dhe ka nisur t’i shajë.
Në këtë moment të tre janë rrahur me grushte me njëri-tjetrim, por më i dëmtuar ka mbetur Kasaj, i cili është dërguar në spital për mjekim për disa orë. Vëllezërit Kaja vijojnë të jenë në kërkim.
