Një avion luftarak trajnimi i Forcave Ajrore të Bangladeshit është rrëzuar sot mbi një kampus shkollor në kryeqytetin Dhaka, duke shkaktuar viktima dhe plagosje të shumta ndërsa fëmijët ndodheshin në mësim.
Avioni llojit F-7 BGI ra mbi kampusin e shkollës “Milestone” në zonën e Uttarës, duke u përplasur me godinën e mensës dhe shkaktuar një zjarr të madh.
Flakët kanë përfshirë të gjithë ndërtesën, ndërsa pamjet nga vendngjarja tregojnë tym të dendur të zi që ngrihet mbi zonën e banuar.
Një trup është nxjerrë nga rrënojat, ndërsa shërbimet e emergjencës vazhdojnë operacionin për shuarjen e zjarrit dhe kërkimin e të mbijetuarve. Burime nga Instituti Kombëtar i Djegieve dhe Kirurgjisë Plastike në Dhaka kanë konfirmuar se mbi 50 persona, përfshirë fëmijë dhe të rritur, janë dërguar në spital me plagë djegieje.
Pamje të publikuara në rrjetet sociale tregojnë momentin kur avioni bie në ndërtesë, si dhe pasojat e menjëhershme: ndërtesa shembet plotësisht dhe nxënësit dalin me vrap nga kampusi, ndërsa të tjerë përpiqen të ndihmojnë në kërkimin e të mbijetuarve.
Forcat Ajrore të Bangladeshit kanë konfirmuar ngjarjen përmes një deklarate zyrtare, ku thuhet se avioni ishte ngritur në fluturim në orën 13:06 me orën lokale. Nuk është bërë ende e ditur nëse piloti ka arritur të shpëtojë, ndërsa identiteti i viktimës së parë nuk është konfirmuar publikisht.
Autoritetet vendase kanë bërë të ditur se operacionet e kërkim-shpëtimit janë ende në zhvillim dhe se numri i viktimave mund të rritet.
