Kryeministri i vendit, Edi Rama ditën e sotme u është përgjigjur pyetjeve të adresuara nga qytetarët në rrjetet sociale, përmes rubrikës “Sy m’sy”.
Një nga pyetjet drejtuar kryeministrit kishte të bënte me aksionin për lirimin e hapësirave publike. Pyetja ishte pse pikërisht ky aksion pas zgjedhjeve të 11 majit.
Edi Rama: Në këto zgjedhje unë për herë të parë isha pjesë e skuadrës së Tiranës. Ndryshe nga fushatat e tjera kam pasur një seri të gjatë takimesh nëpër Tiranë dhe kam mundur të shoh dhe të kaloj në shumë territore të Tiranës që nuk i kisha parë prej kohësh, pasi nuk më kishte çuar puna. Dhe kam vënë re dy gjëra. Nga njëra anë transformimi pozitiv që ka pësuar Tirana dhe negative, në aspektin e një zgjerimi të kufijve të veprimtarisë së njësive të shërbimit në hapësirat publike, gjë që e kam dëgjuar në mënyrë të përsëritur edhe nga qytetarët. Kjo ishte baza e një shqetësimi.
Kreu i qeverisë u ndal shkurtimisht edhe te arrestimi i kryebashkikaut të Tiranës Erion Veliaj, i cili ndodhet në paraburgim që prej shkurtit të këtij viti. Shefi i qeverisë tha se kryeqytetit i mungon drejtimi dhe për këtë arsye është dashur një riorganizim për të konstatuar problematikat e përditshme me të cilat hasen qytetarët, një ndër to edhe zaptimi i hapësirave publike.
Edi Rama: Tiranës i mungon drejtimi prej një kohe jo të shkurtër, por kjo është një histori tjetër, kemi riorganizuar veten duke vendour deputetët në një pozicion edhe më kërkues për sa i përket të qëndruarit afër dhe të të ndjekurit të problemeve në territoret e kujdestarisë së tyre. Dhe ka qenë e qartë kërkesa nr 1 e komunitetit, na çlironi hapësirat publike. Ka ende për të bërë, por jo sepse gjërat janë në pikën ku ishin më parë. Patjetër që ka nevojë për një riorganizim të mëtejshëm. Kemi nisur rrugën me montorimin teknologjik të rrugëve, kemi pjesë të këtij plani pune edhe në monitorimin e shkolleve, por jemi në një proces për të nisur monitorimin teknologjik të strukturuar të territorit ku do të mund të ndjekim gjithçka ndodh në territor përmes dronëve. Kjo do të bëjë që puna e inspekorëve në terren të ballafaqohet me vëzhgimin e teknologjisë./vizionplus.tv
