Microsoft ka pësuar një tronditje të rëndë në sektorin e video-lojërave, pas një vale të gjerë shkarkimesh që ndodhi në fillim të këtij muaji. Situata paraqitet veçanërisht e vështirë për punonjësit e studios King, zhvilluesit e njohur të lojës “Candy Crush”, të cilët po zëvendësohen me mjete të bazuara në inteligjencën artificiale (AI) – teknologji që vetë ata ndihmuan për ta zhvilluar dhe trajnuar.
Sipas burimeve anonime, një numër i konsiderueshëm punonjësish të Kingut në departamente si tregimi, përvoja e përdoruesit (UX), dizajni i niveleve dhe kërkimet mbi sjelljen e përdoruesve, kanë kaluar vite të tëra duke kontribuar në ndërtimin e këtyre modeleve të AI-së. Sot, këto mjete janë të afta të kryejnë detyrat e tyre më shpejt, duke i vënë vendet e tyre të punës në rrezik.
Edhe ekipi i tekstshkruesve nuk i ka shpëtuar kësaj vale, ndërsa një grup me bazë në Londër që punon për lojën “Farm Heroes Saga” pritet të përgjysmohet.
“Është tronditëse që AI po zëvendëson njerëzit. E gjithë kjo duket se po drejtohet vetëm nga kërkesa për efikasitet dhe fitim, ndonëse kompania po performon shumë mirë. Nëse po kërkojmë më shumë cikle përmirësimi, është absurde të largohen zhvilluesit. Ne kemi nevojë për më shumë punonjës, jo më shumë drejtues”, është shprehur një burim për MobileGamer.
Sipas tij, numri i përgjithshëm i shkarkimeve në të gjithë divizionin e lojërave të Microsoftit mund të ketë kaluar 200 persona, një shifër e përmendur edhe nga Bloomberg.
Valët e shkarkimeve kanë prekur gjithashtu edhe studion Halo, ku punonjësit shprehin zhgënjim dhe pakënaqësi të thellë. Të paktën pesë vetë janë pushuar nga puna menjëherë pas dërgimit të një emaili nga drejtori i Microsoft Gaming, Phil Spencer, ku theksohej suksesi financiar aktual i Xbox-it.
Burimet e brendshme theksojnë se Microsoft po shtyn përpara zëvendësimin e punonjësve me agjentë të AI-së, duke promovuar intensivisht përdorimin e Copilot-it në mesin e stafit.
Në një klimë ku efikasiteti dhe automatizimi po marrin përparësi ndaj kontributit njerëzor, shumë punonjës e shohin të ardhmen e tyre në industri si të pasigurt.
