Një aksident rrugor është regjistruar mbrëmjen e sotme, rreth orës 21:10, në rrugën “Dhimitër Konomi”, në vendin e quajtur Palazinë. Në ngjarje janë përfshirë një automjet dhe një biçikletë, ku për pasojë është lënduar një shtetas amerikan.
Sipas të dhënave paraprake nga policia, aksidenti ka ndodhur mes mjetit me targë AE840T, i drejtuar nga Adriatik Lame, 57 vjeç, dhe një biçiklete që drejtohej nga një shtetas amerikan rreth 30 vjeç, i identifikuar si Alex Shower.
Menjëherë pas aksidentit, shtetasi amerikan është transportuar me urgjencë nga ambulanca në Spitalin Rajonal të Vlorës, ku pas marrjes së ndihmës mjekësore është larguar jashtë rrezikut për jetën.
Policia ka kryer veprimet procedurale në vendin e ngjarjes, ndërsa sipas të njëjtave burime, testi i alkoolit për drejtuesin e automjetit ka rezultuar negativ (0.000 mg/l).
Grupi hetimor po vijon punën për sqarimin e plotë të rrethanave të aksidentit.
