Katër vatra zjarri janë ende aktive në të gjithë Qarkun Dibër. Situatë e vështirë mbetet në parkun Kombëtar “Lurë mali Dejës”, ku me gjithë ndërhyrjen prej më shumë se një jave nga toka dhe ajri nuk është arritur që të izolohet zjarri.
Dy vatra janë ende aktive dhe me përmasa të mëdha, ku njëra është pranë liqenit të Luleve.
Flakët kanë përpirë disa hektar pyje me pishë të zezë dhe ahu. Në terren janë dhjetëra forca nga pushteti vendor, agjencia e Zonave të Mbrojtura si dhe efektivë të Forcave të Armatosura.
Ndërsa vatra e zjarrit e aktivizuar të dielën në malin “Vlashaj” të Shupenzës në Bulqizë është zgjeruar.
Era e fortë dhe temperaturat e larta kanë bërë që flakët të përhapen me shpejtësi duke përshkuar një sipërfaqe të konsiderueshme.
Mbrëmjen e së dielës është riaktivizuar edhe vatra e zjarrit në malin e fshatit Peladhi të njësisë administrative Zerqan.
Kjo vatër zjarri ishte izoluar, por era e fortë e ka riaktivizuar.
