Së fundmi, në rrjetet sociale është bërë virale një imazh i një kantieri ndërtimi në Kinë të mbuluar nga një “flluskë” e madhe e bardhë një kupolë e fryrë që ngrihet mbi terrenin dhe shtrihet mbi një sipërfaqe të madhe ndërtimi. Kjo është një nismë e re kineze që pritet të shndërrohet në model për të ardhmen: një kupolë e fryrë 50 metra e lartë, që mbulon 20,000 metra katrorë, duke izoluar plotësisht zonat e gërmimit dhe ndërtimit.
Struktura ka aftësinë të kapë deri në 90% të grimcave të imta të pluhurit dhe të zbusë ndjeshëm ndotjen akustike, duke e ulur zhurmën me rreth 40 decibelë. Kjo është kupola më e madhe e këtij lloji e ndërtuar ndonjëherë në një mjedis urban dhe shënon një ndryshim të madh në mënyrën se si menaxhohen ndikimet mjedisore në qytetet me densitet të lartë.
Sipas autoriteteve lokale, kjo teknologji është vendosur për të mbrojtur lagjet përreth nga ndotja e ajrit dhe zhurma e prodhuar nga makineritë e rënda. Membrana e kupolës është ndërtuar nga poliestër i veshur me PVDF, dhe mbahet e fryrë përmes një sistemi të vazhdueshëm ventilimi që nuk kërkon kolona apo trarë mbështetës, duke e bërë të përshtatshme për çdo lloj terreni ndërtimi. Kjo e bën strukturën të ripërdorshme, rezistente ndaj zjarrit dhe erës, e ankoruar fort me 38 kabllo çeliku.
Brenda saj ndodhen sensorë të temperaturës dhe presionit, të cilët rregullojnë qarkullimin e ajrit dhe aktivizojnë sisteme me mjegull ujore në pikat e daljes së ajrit, duke zvogëluar ndjeshëm përhapjen e grimcave ndotëse në krahasim me kantierët e hapur.
Por Jinan nuk është rasti i vetëm. Në Pekin, kjo teknologji është testuar në zonën financiare të Lize dhe qeveria ka nisur të ofrojë stimuj për ndërtuesit që zgjedhin përdorimin e membranave të gazit. Këto përpjekje janë në përputhje me udhëzimet e Ministrisë së Ekologjisë dhe Mjedisit, që e ka përfshirë këtë teknologji në listën e teknologjive kyçe për ndërtimin e qëndrueshëm deri në vitin 2030.
Kjo qasje inovative jo vetëm që përmirëson cilësinë e jetës për qytetarët, por mund të shndërrohet në një standard të ri global për ndërtimet në zona urbane.
