Pasditen e djeshme në një lokal në Valias, një 34-vjeçar është plagosur me armë zjarri. Pas hetimeve të shpejta, policia ka vënë në pranga dy persona: autorin e dyshuar dhe vetë të plagosurin.
Specialistët për Hetimin e Krimeve në Komisariatin e Policisë Nr. 5, menjëherë pas njoftimit për një shtetas të plagosur që kishte kërkuar ndihmë mjekësore në spital, nisën hetimet për zbardhjen e rrethanave.
Nga veprimet hetimore rezultoi se shtetasi B. K., 51 vjeç, dyshohet se nga pakujdesia ka qëlluar me armë zjarri në këmbë shtetasin F. Xh., 34 vjeç, me të cilin banonin në të njëjtën lagje. Ngjarja ndodhi në një lokal, ndërsa i plagosuri ndodhet jashtë rrezikut për jetën.
Gjatë kontrollit të banesës së autorit të dyshuar, policia gjeti dhe sekuestroi armën e zjarrit, pistoletë, me të cilën dyshohet se është kryer plagosja.
Në pranga përfundoi edhe vetë i plagosuri F. Xh., pasi nuk bashkëpunoi me hetimin dhe pengoi zbardhjen e plotë të ngjarjes, duke mos dhënë informacion të mjaftueshëm për autorin dhe rrethanat.
Materialet procedurale i janë referuar Prokurorisë së Rrethit Gjyqësor Tiranë, për veprime të mëtejshme.
