Presidenti i SHBA, Donald Trump, mbërriti pasditen e sotme në Teksas, shteti që është zhytur në zi pas përmbytjeve të 4 korrikut, ku humbën jetën të paktën 120 persona dhe mbi 170 të tjerë rezultojnë ende të zhdukur.
Vizita, e realizuar së bashku me bashkëshorten e tij Melania, vjen një javë pas fatkeqësisë natyrore, mes kritikave të ashpra ndaj autoriteteve vendore dhe federale për reagimin e vonuar dhe të mangët ndaj emergjencës.
Trump ndodhet në kontenë Kerr – zona më e goditur nga përmbytjet, ku 96 nga viktimat janë raportuar, përfshirë 36 fëmijë. Sipas tij, qëllimi i vizitës është “të jetë pranë disa prej familjeve të prekura”.
Përmbytjet e fuqishme që goditën Teksasin më 4 korrik, Ditën e Pavarësisë, zgjatën pak orë, por shkaktuan katastrofë të menjëhershme. Rreth orës 4 të mëngjesit, banorët e komunitetit Hunt u përballën me rritjen e menjëhershme të nivelit të lumit Guadalupe.
Sipas mediave lokale, një zjarrfikës kërkoi që të dërgohej mesazh emergjent në celularët e banorëve, por iu kërkua të priste miratimin nga një zyrtar më i lartë. Njoftimi për evakuim u dërgua rreth 90 minuta më vonë, ndërsa disa banorë e morën alarmin me vonesë deri në gjashtë orë.
Ndërkohë, më shumë se 2.000 forca kërkim-shpëtimi, policë dhe ekipe me qen të trajnuar dhe helikopterë po patrullojnë prej një jave zonën në kërkim të të zhdukurve. Por autoritetet thonë se shpresat për të gjetur të mbijetuar janë thuajse të shuara.
Menaxhimi i situatës është shoqëruar me kritika të forta për qeverinë federale. Mediat amerikane raportojnë se operacionet e agjencisë së emergjencave FEMA janë penguar nga burokracia dhe kufizimet e reja buxhetore të vendosura nga administrata Trump. Gjithashtu, janë ngritur shqetësime se shkurtimet në Shërbimin Kombëtar të Motit kanë ndikuar në aftësinë për parashikime të sakta dhe paralajmërime në kohë.
Megjithëse Trump ka theksuar në të kaluarën se shtetet duhet të menaxhojnë vetë fatkeqësitë natyrore, këtë herë shpalli gjendjen e jashtëzakonshme për Teksasin, për të mundësuar përdorimin e fondeve federale.
Ministrja e Sigurisë së Brendshme, Kristi Noem, deklaroi se reagimi i qeverisë federale ka qenë “i shpejtë dhe efektiv”, por raportimet nga terreni dhe reagimet e banorëve lënë të kuptohet e kundërta.
