Qeveria miratoi dje një paketë ndryshimesh që rregullojnë mënyrën e regjistrimit të vendbanimit dhe vendqëndrimit të shtetasve në Shqipëri.
Vendimi është miratuar në mbështetje të nenit 100 të Kushtetutës dhe ligjit “Për gjendjen civile” dhe ka për qëllim thjeshtimin dhe modernizimin e procesit nëpërmjet shërbimeve digjitale. Krahas digjitalizimit, vendimi sjell edhe rregulla të reja për shtetasit që ndodhen në institucione shëndetësore apo ato të ekzekutimit të vendimeve penale.
“Ndryshimet kryesore përfshijnë procesin elektronik (Online). Shtetasit me vendbanim ose vendqëndrim në Shqipëri duhet të kryejnë deklarimin, ndryshimin ose saktësimin e vendbanimit/ vendqëndrimit në rrugë elektronike (online), nëpërmjet portalit qeveritar “e-Albania”. Ata duhet të ngarkojnë dokumentin e pronësisë së banesës, kontratën e qiramarrjes, huadhënies, përdorimit ose çdo dokument tjetër ligjor që provon vendbanimin apo vendqëndrimin në adresën e deklaruar”, nënvizohet në vendim.
Në rastet kur një shtetas kërkon të regjistrohet në një familje ekzistuese, ai duhet të dërgojë kërkesën përmes “eAlbania” dhe kjo duhet të miratohet nga kryefamiljari i familjes pritëse në të njëjtën platformë, me kusht që banesa të përmbushë kriteret e përcaktuara për sipërfaqe dhe standarde banimi. Dokumentet e dorëzuara në sistem ruhen në databazën e Regjistrit Kombëtar të Gjendjes Civile dhe çdo ndryshim që bën kryefamiljari për adresën pasqyrohet automatikisht për të gjithë anëtarët e tjerë të familjes. Sipas vendimit, nëse një anëtar madhor i familjes kërkon të ndryshojë adresën e tij, ai duhet të kryejë paraprakisht procesin e veçimit nga familja. Gjithashtu, vendimi përcakton se të gjithë anëtarët e një familjeje duhet të kenë të njëjtën adresë vendbanimi, e cila duhet të jetë e plotë dhe përputhet me standardet e sistemit të adresave.
Shtetasi ka për detyrë të deklarojë vendqëndrimin përveç rasteve të veçanta, duke respektuar rregullat që burojnë nga ky vendim. Ndryshime të veçanta janë parashikuar për shtetasit që qëndrojnë në institucione të posaçme. Kështu, për personat që ndodhen në paraburgim apo vuajnë dënimin me burg për më shumë se tre muaj, institucioni që i mban ka detyrimin të dërgojë listën e tyre emërore pranë zyrës së gjendjes civile brenda 48 orëve nga përmbushja e këtij afati. Po i njëjti detyrim vlen edhe për shtetasit që qëndrojnë në institucionet shëndetësore për qëllime trajtimi të gjatë mjekësor, për më shumë se tre muaj. Në të dy rastet, pas përfundimit të qëndrimit, institucioni përkatës duhet të informojë zyrën e gjendjes civile brenda pesë ditëve. Të gjitha këto procese do të kryhen në mënyrë të ndërveprueshme, përmes platformës qeveritare të ndërveprimit, duke lehtësuar shkëmbimin e informacionit ndërmjet institucioneve dhe zyrave të gjendjes civile në kohë reale.
