Kryeministri izraelit Benjamin Netanyahu tha se është gati të negociojë një “armëpushim të përhershëm” në Rripin e Gazës gjatë armëpushimit 60-ditor, me kusht që enklava palestineze të çmilitarizohet.
“Në fillim të armëpushimit 60-ditor, ne do të fillojmë negociatat për një fund të përhershëm të luftës”, tha Netanyahu në një mesazh të publikuar sot, mes bisedimeve indirekte me Hamasin.
Megjithatë, ai vendosi disa kushte: “Hamasi duhet të lëshojë armët, Gaza duhet të çmilitarizohet, Hamasi nuk duhet të ketë më aftësi ushtarake ose qeveritare”.
“Nëse këto mund të arrihen përmes negociatave, aq më mirë. Përndryshe, ne do t’i arrijmë ato me mjete të tjera, me fuqinë e ushtrisë sonë heroike”, shtoi ai.
Këto deklarata u bënë ndërsa negociatat në Doha vazhduan për të pestën ditë për të arritur një armëpushim dhe për të liruar të gjithë pengjet e mbajtura në Gaza.
Të afërmit e pengjeve kërkojnë që ata të lirohen të gjithë menjëherë, por Netanyahu tha se kjo nuk varet nga Izraeli.
“Ne po negociojmë me një organizatë brutale terroriste dhe duam t’i lirojmë të gjithë menjëherë. Por kjo nuk është në duart tona”, tha ai në mesazhin e tij.
Nga 251 personat e rrëmbyer më 7 tetor 2023 nga Hamasi, 49 mbeten në Rripin e Gazës, por ushtria izraelite beson se 27 prej tyre janë të vdekur.
