Presidenti i SHBA-së, Donald Trump, tha se bisedimet për t’i dhënë fund luftës në Gaza kanë “shkuar shumë mirë”, ndërsa priti kryeministrin izraelit Benjamin Netanyahu në Uashington DC, raporton BBC.
Trump shprehu gjithashtu besim se Hamasi ishte i gatshëm t’i jepte fund konfliktit 21-mujor.
“Ata duan të takohen dhe duan të ketë atë armëpushim”, tha ai në një deklaratë për gazetarët në Shtëpinë e Bardhë.
Takimi erdhi pasi raundet e fundit të bisedimeve indirekte për armëpushim midis Izraelit dhe Hamasit në Katar përfunduan pa ndonjë përparim, megjithëse negociatat pritej të vazhdonin këtë javë.
Në komentet e së hënës, Trump u pyet nga një gazetar se çfarë po e pengonte një marrëveshje paqeje në Gaza dhe ai tha: “Nuk mendoj se ka ndonjë pengesë. Mendoj se gjërat po shkojnë shumë mirë.”
Të dy udhëheqësit u pyetën rreth planeve të mundshme për të zhvendosur palestinezët, dhe Trump tha se ka bashkëpunim nga vendet fqinje me Izraelin.
Ndërkohë, Netanyahu tha se po punonte me SHBA-në për të gjetur vende që do t’u “japin palestinezëve një të ardhme më të mirë”.
“Nëse njerëzit duan të qëndrojnë, mund të qëndrojnë, por nëse duan të largohen, duhet të jenë në gjendje të largohen”, tha Netanyahu.
Presidenca palestineze më parë ka hedhur poshtë planet për zhvendosjen e palestinezëve, të cilat ajo theksoi se do të shkelnin të drejtën ndërkombëtare.
Në takim, kryeministri izraelit tha gjithashtu se e kishte nominuar Trumpin për Çmimin Nobel për Paqen, që thuhet se është një qëllim i kahershëm i presidentit të SHBA-së.
“Ai po krijon paqe ndërsa flasim, në një vend, në një rajon pas tjetrit”, tha Netanyahu ndërsa i dorëzoi Trump një letër që ia kishte dërguar komitetit të çmimit.
Trump më parë ka thënë se do të jetë “shumë i vendosur” me kryeministrin izraelit për t’i dhënë fund luftës dhe ka lënë të kuptohet se “do të arrijmë një marrëveshje” këtë javë.
Propozimi i armëpushimit i mbështetur nga SHBA-të thuhet se parashikon lirimin e 10 pengjeve të gjalla dhe trupave të 18 pengjeve të vdekura nga Hamasi në pesë faza gjatë një armëpushimi 60-ditor.
Izraeli do të detyrohej të lironte një numër të panjohur të të burgosurve palestinezë dhe të tërhiqej nga pjesë të Gazës, ku tani kontrollon rreth dy të tretat e territorit.
Pengesat për një marrëveshje mbeten të konsiderueshme.
Çështja kryesore e pazgjidhur lidhet me ndihmën, pasi Hamasi këmbëngul në ndërprerjen e punës së Fondacionit Humanitar të Gazës, ndërsa delegacioni izraelit refuzon të diskutojë çështjen, duke thënë se nuk janë të autorizuar ta diskutojnë atë.
Gjatë vizitës së tij, Netanyahu u takua me Sekretarin e Shtetit të SHBA-së, Marco Rubio, dhe të dërguarin e Trumpit në Lindjen e Mesme, Steve Witkoff.
Ndërsa limuzina e blinduar e Netanyahut udhëtonte drejt Shtëpisë së Bardhë, dhjetëra protestues u mblodhën në portat e sigurisë, duke valëvitur flamuj palestinezë dhe duke bërë për arrestimin e kryeministrit izraelit.
