8 persona, mes tyre një shtetas shqiptar, u arrestuan në Belgjikë pasi autoritetet zbuluan një sasi të madhe kokaine në një anije cisternë turke.
Anija “Scot Bremen”, e nisur nga porti Pecem në Brazil dhe me destinacion qytetin Ghent, u devijua në portin Zeebrugge, ku u zhvillua një kontroll i detajuar.
Droga u gjet në bordin e cisternës, e cila ndodhet ende e ankoruar në terminalin Westerhoofd.
Arrestimet u kryen në marinën e Blankenberge, pasi policia pikasi tetë burra që po lëshonin në ujë një varkë të fryrë me trup të ngurtë. Sipas raportimeve të mediave të huaja, të ndaluarit dyshohet se janë të përfshirë në një rrjet trafiku droge.
Të arrestuarit janë katër shtetas belgë, tre holandezë dhe një shqiptar. Ende nuk është konfirmuar nëse grupi i ndaluar ka lidhje të drejtpërdrejtë me ngarkesën e drogës, ndërsa autoritetet belge po vijojnë hetimet.
