Elon Musk thotë se po themelon një parti të re politike, disa javë pas përplasjes së tij publike me presidetin Donald Trump, raporton BBC.
Miliarderi njoftoi në platformën e tij të mediave sociale X se kishte krijuar “Partinë Amerikane”, duke sfiduar sistemin tradicional me dy parti.
Megjithatë, është e paqartë nëse partia është regjistruar zyrtarisht tek autoritetet zgjedhore të SHBA-së.
Musk, i cili nuk ka lindur në SHBA, nuk është i kualifikuar për të kandiduar për president të Amerikës. Ai nuk ka bërë me dije se kush do ta udhëheqë partinë e re.
Miliarderi e ngriti për herë të parë mundësinë e formimit të një partie gjatë përplasjes së tij publike me Trumpin.
Gjatë debatit, Musk postoi një sondazh në X duke i pyetur përdoruesit nëse duhet të ketë një parti të re politike në SHBA.
Duke iu referuar atij sondazhi në postimin e tij të shtunën, Musk shkroi: “Kur bëhet fjalë për falimentimin e vendit tonë me shpërdorim dhe ryshfet, ne jetojmë në një sistem njëpartiak, jo në demokraci.
“Sot, Partia Amerikane është formuar për t’ju rikthyer lirinë tuaj.”
Deri të shtunën, Komisioni Federal Zgjedhor nuk kishte publikuar dokumente që tregonin se partia ishte regjistruar zyrtarisht.
Edhe pse ka pasur aktorë të profilit të lartë jashtë sistemit tradicional dypartiak në politikën amerikane, ka qenë e vështirë për ta të fitojnë popullaritet mjaftueshëm të fortë në të gjithë vendin sa të përbëjnë një kërcënim të vërtetë.
Musk gjatë fushatës elektorale në zgjedhjet presidenciale ishte një mbështetës kryesor i Trump.
Ai ishte gjithashtu mbështetësi kryesor financiar i Trump: Musk shpenzoi 250 milionë dollarë (187 milionë paund) për ta ndihmuar atë të rifitonte mandatin e Presidentit.
Pas zgjedhjeve, ai u emërua për të drejtuar të ashtuquajturin Departamentin e Efikasitetit të Qeverisë (Doge), i cili ishte ngarkuar me identifikimin e shkurtimeve të rëndësishme në buxhetin federal.
Përplasjet e tij me Trump filluan kur ai u largua nga administrata në maj dhe kritikoi publikisht planet e Trump për taksat dhe shpenzimet.
