Aeroportet franceze janë përfshirë nga kaosi këtë të premte (4 korrik) për shkak të një greve dyditore të kontrollorëve të trafikut ajror, duke sjellë ndërprerje masive në udhëtimet ajrore brenda dhe jashtë vendit.
Sipas Autoritetit të Aviacionit Civil Francez (DGAC), janë anuluar mbi 40% e fluturimeve në Charles de Gaulle, Orly dhe Beauvais, ndërsa 50% në aeroportin e Nices dhe rreth 30% në qytete të tjera, përfshirë Marseille dhe Lyon.
Sindikatat e punonjësve të kontrollit ajror, përfshirë UNSA-ICNA, kërkojnë shtim të stafit për të përballuar rritjen e trafikut ajror, përmirësim të kushteve të punës, kompensim për inflacionin. Ata po ashtu kundërshtojnë reformat e propozuara, që synojnë mbikëqyrje më të rreptë të operacioneve të tyre.
Greva vjen në një moment të ndjeshëm: fundi i vitit shkollor dhe fillimi i sezonit të pushimeve verore.
Sipas asaj që raportojnë mediat ndërkombëtare, linjat ajrore më të prekura janë Ryanair, që anuloi mbi 400 fluturime, duke prekur më shumë se 70,000 pasagjerë.
EasyJet anuloi 274 fluturime, ndërsa British Airways përdori avionë më të mëdhenj për të përballuar fluksin. Ndikimi u ndje edhe në fluturimet që kalojnë përmes hapësirës ajrore franceze.
